Umpasa Dohot Umpama Batak

1. Angka Hata Umpasa
1. Di na pasahathon ulos tu Pengantin:

Di ginjang ma ia arirang di toru panggonggonan
Badanmuna ma na sora sirang, tondimuna masigomgoman.

Tubu ma si marlasuna di Dolok Purbatua
Sai ganjang ma umurmuna, sahat tu na sari matua

Bintang na rumiris, ombun na sumorop

Tubu ma anak di hamu riris, boru pe antong torop.

Tangki jala ualang, galinggang jala garege
Tubu ma di hamu anak partahi jala ulubalang
dohot boru namora jala pareme

Tubu ma tambinsu di toru ni pinasa
Tubu ma di hamu anak nabisuk dohot boru nauli basa.

Eme sitamba tua parlinggoman ni siborok,
Sai dilehon Debata ma di hamu tua, jala hot ma hamu diparorot.

Dohot angka na asing.

2. Di na pasahathon ulos tu natua-tua ni hela (si jalo bara) dohot si angka jalo ulos suhi ni ampang na opat.

Dolok ni Purbatua jonok tu si borotan
Sai sahat ma hamu saur-matua, tiur di pansamotan

Andor halumpang ma togu-togu ni lombu, andor hatiti togu-togu ni horbo
Sai ganjang ma umurmu pairing-iring pahompu sahat ma tu na marnini marnono.

Bona ni Aek Puli di Dolok Sitapongan
Sai ro ma tu hamu angka nauli, jala sai dor nang pansamotan.

Binanga ni Sihombing binokkak ni Tarabunga, tu sanggar ma amporik tu lubang ma satua,
Sinur ma pinahanmuna, gabe na niulamu dipasu-pasu Tuhanta.

Eme sitamba tua parlinggoman ni siborok,
Amanta Debata do si lehon tua, luhut ma hamu diparorot.

Sahat solu sahat tu Tigaras,
Leleng hamu mangolu, gabe jala horas.

Marmutik ma lasiak dompak mata ni ari,
Manganju ma hamu di borungku parumaenmi, arian dohot botari.

Hariara ma bonana, hariara ma nang bulungna,
Gabe jala horas hula-hulana, songon i nang pamoruonna.

Dohot angka na asing.

3. Hata umpasa sian hula-hula dohot horong ni Tulang.

Hot pe jabu i sai tong do i marbulang-bulang,
Tung sian dia pe mangalap boru bere i, sai hot do i boru ni tulang.

Dangka ni bulu godang tanggo pinangait-aithon
Dilehon Debata ma di hamu tubuan anak dohot boru, si tongka panahit-nahiton.

Andos ras ma tu andor ris, tubu di huta Purbasinomba,
Sai horas-horas ma hamu jala torkis-torkis, ditumpak asi ni roha ni Tuhanta.

Binsar mata ni ari, poltak mata ni bulan,
Sai tubu ma di hamu boru namalo mansari dohot anak na gabe raja panungkunan.

Giring-gring ma tu gosta-gosta, tu boras ni singkoru,
Sai tibu ma hamu mangiring-iring pahompu, tibu mangompa-ompa anak dohot boru.

Sahat-sahat ni solu, sahat ma tu bontean,
Sahat ma hamu leleng mangolu, sahat tu parhorasan panggabean.

Eme sitamba tua parlinggoman ni siborok,
Debata do si lehon tua, horas hamu diparorot.

Dohot angka na asing.

4. Hata umpasa di na paampuhon hata dohot mangampu hata.

Aek marjullak-jullak, marjullak-jullak sian batu, tinahu tu batu-batu.
Angka hata nauli, hata pasu-pasu naung hupasahat hami tu hamu, ampu hamu ma i di tonga ni jabu.

Naung sampulu pitu jumali sampulu ualu
Hata nauli, hata pasu-pasu, ampu hamu ma di tonga ni jabu.

Turtu ma inna anduhur, tio ma ninna lote,
Hata nauli, hata pasu-pasu, sai unang muba sai unang mose.

Marmutik ma inggir-inggir, bulung na i rata-rata,
Hata nauli, hata pasu-pasu naung pinasahatmuna, napasauthon ma ma Debata.

Dohot angka na asing.

5. Hata umpasa di na mangingani manang manuruk jabu.

Labu pe labu i, ndang asal suanhononhon,
Jabu pe jabu, ndang asal inganan.

Mabaor aek puli sian dolok ni Simamora,
Sai hot ma jabunta on bagas na uli, ingananmu marlas ni roha.

Tangkas do jabu suhat, laso tangkas do jabu bona,
Sai tangkas ma hamu dung maringanan di jabu on maduma, tangkas nang mamora.

Andor ras ma tu andor ris di tombak ni Purbasinomba
Sai horas-horas ma hamu torkis-torkis, tumpahon ni Debata namartua.

Jongjong di Dolok Purbasinomba, manatap tu Panamparan,
Sahat ma hamu saur-matua mangingani jabu on dihaliangi angka pomparan.

Sahat-sahat ni solu toho di rondang ni bulan,
Sahat ma hamu leleng mangolu mangingani bagas on, sai diiring-iring Tuhan.

Eme si tamba tua parlinggoman siborok,
Sai dilehon Tuhanta ma di hamu tua, hot ma hamu di jabu on diparorot.

Dohot angka na asing.

6. Hata umpasa di ulaon na tardidi

Tubu ma tambinsu di dolok ni Pangaribuan,
Sai anak nabiusk ma ibana, anak na gabe si pajoloon.

Dangka ni hariara ma ni pangait-aithon
Simbur ma ibana mangodang, sitongka panahit-nahiton.

Horbo ni Sibuluan manjampal di balian,
Sai dapot ma angka naniluluan, sai tiur ma nang pansarian.

Habang ambaroba di atas ni Sibuntuon,
Sai burju ma ibana marroha, gabe jolma si tiruon.

Dolok ni Hutanauli hatubuan ni si marlasuna,
Goar nauli ma goarna i, donganna gabe jala mamora.

Eme sitamba tua parlinggoman ni siborok,
Sai dilehon Debata ma di ibana tua, imbur magodang diparorot.

Dohot angka na asing.

7. Hata umpasa di na pasahathon ulos mula gabe

Sanjongkal urat ni ri, tolu jongkal urat ni singkoru,
Ulos mula gabe naung pinasahat i, sai saur ma i di hamu, mangulosi anak dohot boru.

Tubu ma lata di toru ni bunga-bunga,
Tubu ma anak na marsangap di hamu dohot boru na martua.

Habang binsak-binsak laos mangihut ambaroba,
Sai tibu ma ro na tapaima, jala dapot nahinirim ni roha.

Tangki ma jala ualang, galinggang jala garege,
Sai tubu ma di hamu anak partahi jala ulubalang, dohot boru namora jala pareme.

Eme si tambatua ma parasaran ni siborok,
Sai dilehon Debata ma di hamu gogo dohot tua, hot ma hamu diparorot.

Obuk do jambulan nanidandan bahen samara,
Molo mamasu-masu hula-hula, padao sahit dohot mara.

Dohot angka na asing.

8. Hotang do binebe-bebe, hotang nipulos-pulos,
   Unang hita mandele ai adong do tudos-tudos.

Bagot na madung-dung ma tu pilo-pilo na marajar,
Sai salpu ma angka nalungun, sai ro ma angka najagar.

Tombak ni Simalungun parsobanan ni Simamora,
Sai hatop ma salpu angka nalungun, jala hatop ma ro si las ni roha.

Balga tiang ni ruma, umbalgaan tiang ni sopo,
Nunga ganjang umur ni naung jumolo i, sai gumanjang ma umur ni angka naumposo.

Tuak natonggi ma tu bagot si balbalon,
Tung paet di tingki angka na salpu i, sai ro ma angka natonggi tu joloan on.

Tinapu bulung siarum bahen uram ni pora-pora,
Nahasit i tibu ma malum, jala tibu ma ro si las ni roha.

Eme sitambatua parlinggoman siborok,
Sai dilehon Tuhanta ma di hamu tua, jala sude hamu sai diparorot.

Dohot angka na asing.

9. Angka hata umpasa di huhuasi ni sipanganon

Si titi ma si hompa, golang-golang pangarahutna,
Otik so sadia pe na tupa, sai godang ma pinasuna.

Bagot na marhalto ma tubu di robean,
Horas ma namanganhon, horas namangalean.

Huta Tanobato parasaran ni leang-leang,
Horas ma hami namanjalo, horas ma di hamu namangalean.

Otik si butong-butong, godang si pir ni tondi,
Otik so sadia na boi hupatupa hami, pamurnas ma i tudaging, saudara tu bohi, si palomak imbulu ma i, si paneang holi-holi.

Dohot angka na asing.

2. Angka hata umpama

Aek godang tu aek laut,
angka dos ni roha do si behen na saut.

Si hikkit si nalenggam,
tapillit ma nadumenggan.

Eme na masak di gagat ursa,
I ma na masa (denggan) i ma niula.

Sinuan bulu sibahen na las,
Sinuar adat dohot uhum sibahen na horas.

Ompu raja di jolo martungkot sialagundi,
Angka adat nauli napinungka ni ompunta na parjolo, siihuthonon ni hita na di pudi.

Baris-baris ni gaja di rura Pangaloan,
 Molo marsuru raja, dae do so oloan.

Pat ni gaja tu pat ni hora,
Angka anak ni raja jala pahompu ni namora.

Asing dolok asing duhutna,
Asing luat, asing ruhutna.

Sise do mula ni hata, sungkun mula ni uhum,
Gokhon sipaimaon jou-jou sialusan.

Sotongka do mulak tata naung masak,
Mulak marimbulu naung tinutungan.

Unang songon tagading, marguru tu anakna.

Piltik ni hasapi do tabo begeon ni pinggol,
Piltik ni hata sogo begeon.

Madekdek jarum tu napotpot,
Ndang diida mata, diida roha.